Muling nagbukas ang mga registration centers ng Philippine Statistics Authority (PSA) para sa National ID program sa CALABARZON noong ika 20 ng Enero 2025, na may layuning matulungan ang mga mamamayan sa rehiyon na makumpleto ang kanilang pagkuha ng National Identification o National ID.

Ayon kay PSA Regional Director Charito C. Armonia, ang muling pagbubukas ng National ID registration ay isinagawa upang matugunan ang pangangailangan ng mga residente sa CALABARZON na wala pang National ID. Ito ay bilang bahagi ng mas malawak na inisyatiba ng gobyerno na pabutihin ang mga serbisyo sa mga mamamayan at magkaroon ng isang centralized na sistema para sa iba't ibang transaksyon.

Sa mga unang linggo ng taon, inumpisahan ang muling pag-aalok ng registration slots sa mga lokal na opisina at mga mobile registration units na inilunsad sa iba't ibang bayan at lungsod sa rehiyon. Nakatuon ang PSA na gawing mas accessible ang mga registration sites para sa mga residente sa mga malalayong lugar.

Inaasahan na sa muling pagsimula ng National ID registration ay makikinabang hindi lamang ang mga taga-CALABARZON kundi pati na rin ang iba pang bahagi ng bansa. Ang pagsasama-sama ng mga impormasyon sa isang ID ay makatutulong sa paglutas ng mga isyu ukol sa pagkakakilanlan ng isang tao at pagbabawas ng mga peke at hindi awtorisadong dokumento.

Patuloy ang PSA sa pagbibigay ng impormasyon at gabay tungkol sa proseso ng pagpaparehistro. Hinihikayat ang mga mamamayan na magtungo sa mga nakatalagang registration centers o makipag-ugnayan sa kanilang mga lokal na tanggapan upang magpatala.

Ang National ID ay isang pambansang proyekto ng gobyerno na pinangungunahan ng PSA upang magtatag ng isang unified at secure na sistema ng pambansang pagkakakilanlan para sa lahat ng mga Filipino.

SGD. CHARITO C. ARMONIA
Regional Director

WAV/JBN